PARTI DEL MAL
Anno:
Gruppo:
Testo e musica: (Anonimo) |Menu
Parti de mal e a bien aturné
voil ma chançun a la gent fere oir,
k’a sun besuing nus ad Deus apelé
si ne li deit nul prosdome faillir,
kar en la cruiz deignat pur nus murir.
Mult li doit bien estre gueredoné
kar par sa mort sumes tuz rachaté.
Cunte, ne duc, ne li roi coruné
ne se pöent de la mort destolir,
kar quant il unt grant tresor amassé
plus lur covient a grant dolur guerpir.
Mielz lur venist en bon jus departir,
kar quant il sunt en la terre buté
ne lur valt puis ne chastel ne cité.
Allas, chettif! Tant nus sumes pené
pur les deliz de nos cors acumplir,
ki mult sunt tost failli e trespassé
kar adés voi le plus joefne enviellir!
Pur ço fet bon paraïs deservir
kar la sunt tuit li gueredon dublé.
Mult en fet mal estre desherité!
Mult ad le quoer de bien enluminé
ki la cruiz prent pur aler Deu servir,
k’al jugement ki tant iert reduté
– u Deus vendrat les bons des mals partir
dunt tut le mund ‹deit› trembler e fremir –
mult iert huni, kei serat rebuté
kei ne verad Deu en sa maësté.
Si m’aït Deus, trop avons demuré
d’aler a Deu pur sa terre seisir
dunt li Turc l’unt eisseillié e geté
pur noz pechiez ke trop devons haïr.
La doit chascun aveir tut sun desir,
kar ki pur Lui lerad sa richeté
pur voir avrad paraïs conquesté.
Mult iert celui en cest siecle honuré
ki Deus donrat ke il puisse revenir.
Ki bien avrad en sun païs amé
par tut l’en deit menbrer e suvenir.
E Deus me doinst de la meillur joïr,
que jo la truisse en vie e en santé
quant Deus avrad sun afaire achevé!
E il otroit a sa merci venir
mes bons seignurs, que jo tant ai amé
k’a bien petit n’en oi Deu oblié!
voil ma chançun a la gent fere oir,
k’a sun besuing nus ad Deus apelé
si ne li deit nul prosdome faillir,
kar en la cruiz deignat pur nus murir.
Mult li doit bien estre gueredoné
kar par sa mort sumes tuz rachaté.
Cunte, ne duc, ne li roi coruné
ne se pöent de la mort destolir,
kar quant il unt grant tresor amassé
plus lur covient a grant dolur guerpir.
Mielz lur venist en bon jus departir,
kar quant il sunt en la terre buté
ne lur valt puis ne chastel ne cité.
Allas, chettif! Tant nus sumes pené
pur les deliz de nos cors acumplir,
ki mult sunt tost failli e trespassé
kar adés voi le plus joefne enviellir!
Pur ço fet bon paraïs deservir
kar la sunt tuit li gueredon dublé.
Mult en fet mal estre desherité!
Mult ad le quoer de bien enluminé
ki la cruiz prent pur aler Deu servir,
k’al jugement ki tant iert reduté
– u Deus vendrat les bons des mals partir
dunt tut le mund ‹deit› trembler e fremir –
mult iert huni, kei serat rebuté
kei ne verad Deu en sa maësté.
Si m’aït Deus, trop avons demuré
d’aler a Deu pur sa terre seisir
dunt li Turc l’unt eisseillié e geté
pur noz pechiez ke trop devons haïr.
La doit chascun aveir tut sun desir,
kar ki pur Lui lerad sa richeté
pur voir avrad paraïs conquesté.
Mult iert celui en cest siecle honuré
ki Deus donrat ke il puisse revenir.
Ki bien avrad en sun païs amé
par tut l’en deit menbrer e suvenir.
E Deus me doinst de la meillur joïr,
que jo la truisse en vie e en santé
quant Deus avrad sun afaire achevé!
E il otroit a sa merci venir
mes bons seignurs, que jo tant ai amé
k’a bien petit n’en oi Deu oblié!