Canzoni

Anno: 1500

Gruppo:

Menu

• Lettera V

Vintitré le fronne de verdespina
ce nascette ninno chessa matina
e na stella lucente
disse tienilo a mente
a stu munno non guardare
ca li ffronne fa seccare
si l’amore vuò truvare
spine amare aje da chiantare.

Vintitré li rrose ca io chiantaje
cu lu chianto mio mo’ addacquaje
ma lu munno mercante
ca d’amore è vacante
tre carline ne vò dare
e li rrose vò cumprare
‘ntra li ddete vò sfrunnare
po’ li vuole scarpesare.

Vintitré streppone fanno lamiento
nce passaje la notte sott’ a lu viento
na chiantuta de stelle
na cajola d’aucielle
ca stu munno è tristo assaje
te ‘ncatena sempre craje
quanno primma te guardaje
e d’amore te parlaje.

Vintitré catene de tiempo amaro
me ‘mbarcaje nu juorno pe’ marenaro
pe’ piscare n’aniello
ca perdette n’auciello
chillo auciello sfurtunato
ca ‘ngajola era ‘ngappato
e allo mare sconfinato
chill’aniello aveva jettato.

Vintitré li rezze fatte ‘a canciello
cu lu mare attuorno c’è nu castiello
‘nce passaje sanacore
nenna mia primm’ammore
e me disse : nun lu saje
chill’auciello io truvaje
si lu core me darraje
vintitré oje vintitré vase avarraje.